執波仔 CADDY
Mobile image
Mobile image
CADDY - 香港本地波boot品牌，成立於2017年，早期專注代購日本頂級足球鞋（波boot）。多年來與客戶緊密互動，我們發現主流品牌為追求極致表現而犧牲舒適度，改用人工物料、縮窄鞋型，令舒適波boot難尋。 這個香港足球鞋市場的缺口促使我們創立 CADDY 品牌。CADDY 以「COMFORTABLY PROFESSIONAL — 舒適地專業」為宗旨，堅信頂級表現與舒適度可以並存，並致力為足球愛好者提供舒適、專業的產品。即將推出的首款袋鼠皮足球鞋正體現此理念，標誌著 CADDY 從經銷商蛻變為製造商。

是咁的，有條痴線佬搞左個香港足球鞋品牌

是咁的，話說小弟係2017年因為本身返緊份工太得閒，於是就想搵D副業搞下啦，諗黎諗去發現好似都只得波BOOT呢樣野比較小人做，而我又真係有D興趣，仲要岩岩去完日本買完波BOOT覺得真係好很正 果陣市面上都已經有幾間ONLINE BOOT鋪，不過我發現左幾個重點: 1. 所有關於波BOOT介紹都係好片面，但D BOOT可以呢款窄D果款闊D，好易買錯 2. 袋鼠皮呢個咁舒服的物料好似無咩人提 3. 當時市面又好似無咩日本品牌 於是，果排就不停咁刨資料，不停咁去睇，然後都掙扎左好耐先去出第一個IG POST。我仲記得頭幾個POST唔係賣野的，純粹係分享下。 出左幾篇文之後，開始有人留言大家一齊吹下水，果下個感覺其實覺得好神奇。於是我決定將呢個神奇延續落去，出左第一個代購POST! 其實諗返都好搞笑，因為小弟係一個對網購0知識0經驗的人，唔好講話係日本買野返黎香港，連最簡單的淘寶都唔識，而呢條粉皮竟然開左檔野代購日本波BOOT。 我仲好記得當時頭兩個客係買左D咩，一個係買左SVOLME頭帶手帶，另一個係買左對NB VISARO KLITE袋鼠皮，堅係多謝佢地當時信我，因為果陣我都係盲中中咁訂返黎。 而呢個… 就係執波仔的起源。 至於點解會痴左線走去搞自己品牌嫁呢? 個答案係因為… 屎忽痕! 覺得點解唔可以有闊腳BOOT又係袋鼠皮仲要係AG釘的選擇，明明呢個應該係一個好好的COMBINATION。上網搵左好多好多，好似咩牌子都無呢個選擇 當時岩岩學識用淘寶，咪搵下會唔會有D訂製波BOOT的鋪頭囉，點知又真係有。我記得可以俾你揀闊定窄，AG定TF，車線、用料都有得揀。果陣我就揀闊腳AG半袋鼠皮料，到貨試上腳唔差WO… 於是影左幾張相，扔左上FACEBOOK，標題係: 香港首個足球品牌準備上線喇! 點知就係咁，一瞬間多左唔少人識得執波仔，一時之間蘋果動有訪問，電台有訪問，足球周刊有訪問，仲客串過幾期幫手寫評測 然後，呢個自家品牌就正式開始發芽了。
Mobile image

<<是咁的，有條痴線佬搞左個香港足球鞋品牌>> 第二章: 目的、願景

如果要好認真去講做呢件事的目的同願景係咩，我諗要分為返開疫情前、疫情後，呢個都係執波仔的一個好重要分水嶺。 疫情前，我會形容我當時只係一味衝，果陣對鞋的結構認識只係好皮毛好皮毛，所以我當時只係一心想快D做好我想要的鞋出黎 淨係要求對鞋個樣正正常常，闊腳、袋鼠皮、AG釘，THAT’S IT，忽略左好多好多細節。 果陣的我，天真過天真嬌，一心認為可以呢度抄D果度抄D，用NIKE的鞋底，MIZUNO的鞋面同闊度，而呢個CONFIGURATION就係當時的目標。 疫情過後，其實自家BOOT都接近收皮，無左當時種衝勁。但經過幾年的沉淟，加上市面D BOOT愈黎愈唔人性化，大家波友好多唔同的FEEDBACK都再次肯定我對一對人性化波BOOT的理解。加埋俾D屎忽鬼大石責死蟹過橋抽板，我唔想再俾人揸住個春袋，死就死啦，最多唔掂到時咪乖乖地繼續打工囉。 而家的我，對於自己的品牌定位目標好清楚。COMFORTABLY PROFESSIONAL係我品牌的宗旨，舒適地專業先係我地一般普羅大眾的需要。 大球星們係收錢去踢波，收錢去著品牌SPONSOR的鞋，只要有機會可以提升表現的方法都會去嘗試，踢波係佢地收入來源。不過，我地普通人係俾錢去踢波，俾錢買對鞋去踢波，點解要為難自己要自己受苦受傷…… 對我地黎講，踢波係支出的來源，唔知大家明唔明個分別… CHOOSE THE RIGHT BOOT，PLAY WITH JOY 執波仔品牌目標係想大家揀岩鞋，踢得開心。將來希望可以每個踢波的香港人都會識CADDY呢個品牌，唔係因為邊個球星著緊，而係因為我品牌的波BOOT岩自己著，著得舒服
Mobile image